Rivian-ი, Hyundai, Toyota და Cadillac-ი Tesla-ს „ნარჩენებისთვის“ იბრძვიან

Tesla კვლავ რჩება შეერთებულ შტატებში ელექტრომობილების ყველაზე მსხვილ გამყიდველად. კონკურენტების მცდელობის მიუხედავად, ბაზარზე ლიდერის პოზიციის შერყევა თითქმის ვერავინ შეძლო.

ივლისში აშშ-ში სულ 77 266 ახალი ელექტრომობილი გაიყიდა, რაც ივნისთან შედარებით 3.2%-ით მეტია, თუმცა გასული წლის იმავე პერიოდთან შედარებით 41.5%-იან კლებას აჩვენებს. სულ ახალი ავტომობილების გაყიდვებში ელექტრომოდელების წილმა 5.6% შეადგინა. წლიური ვარდნა მარტივად აიხსნება: 2025 წლის ივლისში ჯერ კიდევ მოქმედებდა ელექტრომობილების ფედერალური საგადასახადო შეღავათი, რომელიც მყიდველებმა მანამ გამოიყენეს, სანამ ტრამპის ადმინისტრაცია ამ სტიმულს სექტემბერში გააუქმებდა.

Cox Automotive-ის მონაცემებით, გასულ თვეში გაყიდული ელექტრომობილებიდან 42 435 ერთეული Tesla იყო, რაც ბაზრის 55%-იან წილს შეადგენს. Tesla-ს გაყიდვების მოცულობა ივნისთან შედარებით 4.9%-ით გაიზარდა. ძირითადი დატვირთვა, როგორც ყოველთვის, Model Y-ზე მოვიდა — მან ქვეყანაში გაყიდული ყველა ახალი ელექტრომობილის 37% შეადგინა. ფაქტობრივად, ამ ერთ მოდელზე არჩევანი უფრო მეტმა ამერიკელმა შეაჩერა, ვიდრე ნებისმიერი კონკურენტი ავტომწარმოებლის მთლიან ელექტრო-პორტფოლიოზე.

როგორ ნაწილდება ბაზრის დანარჩენი წილი კონკურენტებს შორის?

მთლიანი მეორე კვარტლის განმავლობაში Tesla-ს წილი ოდნავ დაბალი — 50.5% იყო. ამ პერიოდში კომპანიამ აშშ-ში 124 800 ელექტრომობილი გაყიდა (13.1%-იანი კლება გასულ წელთან შედარებით). მეორე კვარტალში ელექტრომობილების ბაზრის სიდიდით მეორე წილი Chevrolet-ს ერგო (6%), რომელსაც მოსდევენ Hyundai — 5.8%-ით,  Cadillac — 4.9%-ით, Toyota — 4.8%-ით, Rivian — 4.6%-ით და Ford — 3.9%-ით.

მსხვილ ბრენდებს შორის ივლისში თვიური ზრდის ყველაზე მაღალი მაჩვენებელი Hyundai-ს ჰქონდა (+36%). გაყიდვები გაზარდა Kia-მაც, ძირითადად ფლაგმანური EV9-ის ხარჯზე.