Mazda CX-5-მა „ლოსის ტესტზე“ არც ისე კარგი შედეგი აჩვენა

ავტომობილის „მოქნილობისა“ და მანევრირების შეფასების ერთ-ერთი ყველაზე მკაცრი გამოცდა „ლოსის ტესტია“ (Moose Test). ამ ტიპის ტესტი სკანდინავიურ ქვეყნებში გახდა პოპულარული: ავტომობილს ევალება, ელვისებურად გადავიდეს მეზობელ ზოლში და მალევე დაბრუნდეს უკან, თითქოს გზაზე მოულოდნელად გამოჩენილ დიდ ცხოველს ერიდება.

ასევე იხილეთ: ვინ, როგორ და რატომ შექმნა მსოფლიოში ყველაზე უცნაური ძრავა?

Mazda-ს სპორტული რეპუტაციიდან გამომდინარე, მოსალოდნელი იყო, რომ ახალი CX-5 ტესტს იდეალურად გაივლიდა, თუმცა ესპანური გამოცემის მიერ ჩატარებულმა ტესტმა დიდად შთამბეჭდავი შედეგი ვერ აჩვენა.

ტესტირება ცნობილმა ესპანურმა გამოცემამ km77-მა ჩაატარა. როგორც ვიდეოში ჩანს, CX-5-მა მკვეთრი მანევრისას ძარის საკმაოდ ძლიერი გადახრა გამოავლინა, ხოლო მისი საუკეთესო დრო არცთუ ისე შთამბეჭდავი აღმოჩნდა. ტესტერმა დისტანცია 26.3 წამში დაფარა — ზუსტად იმავე დროში, რაც გიგანტურმა, ჰიბრიდულმა Land Rover Range Rover-მა აჩვენა. მან ასევე 0.1 წამით ჩამორჩა შედარებით კომპაქტურ Mini Countryman-სა და Renault Scenic-ს.

გარდა ამისა, მაქსიმალური სიჩქარე, რომლითაც მძღოლმა ტესტის წარმატებით გავლა შეძლო, 71 კმ/სთ იყო. შედარებისთვის: უფრო დიდმა, უკანა ამძრავიან პლატფორმაზე აგებულმა Mazda CX-60-მა იგივე ტესტი 77 კმ/სთ-ით გაიარა.

თუმცა, ტესტს მხოლოდ უარყოფითი მხარეები არ ჰქონია. გამოცემამ აღნიშნა, რომ ავტომობილის ქცევა იყო სრულიად პროგნოზირებადი და სტაბილური, რაც მას ადვილად მართვადს ხდის, თუმცა არა მაინცდამაინც სწრაფს ან სპორტულს.

ტესტი მთლიან რეალობას არ ასახავს

ახალი CX-5-ის დაკიდების სისტემა წინა თაობებთან შედარებით უფრო რბილია, რამაც ავტომობილს მანევრებში ძარის მეტი გადახრა და ოდნავ ნაკლები რეაქციულობა მისცა. თუმცა, ამის სანაცვლოდ, ახალი თაობის CX-5 უსწორმასწორო გზებზე გაცილებით კომფორტული გახდა.

სალონი კვლავ მაღალი ხარისხის და პრემიუმ მასალებითაა დამზადებული. ავტომობილი შესანიშნავ შედეგებს აჩვენებს  უსაფრთხოების ტესტებშიც.