მასკი ირწმუნება, რომ Cybertruck-ი ძალიან წარმატებული პროექტი იყო

Tesla-ს გენერალური დირექტორი ილონ მასკი ფოლადის ეგზოტიკური პიკაპის, Cybertruck-ის გარშემო მიღებულ სკანდალურ გადაწყვეტილებას თავგამოდებით იცავს. კომპანია მოდელის წარმოების სრულად შეჩერებას გეგმავს, მიუხედავად იმისა, რომ მასკის მტკიცებით, მოთხოვნა და შეკვეთების რაოდენობა წარმოების შესაძლებლობებს კვლავ საგრძნობლად აღემატება.

ასევე იხილეთ: 7 ყველაზე გიჟური პიკაპი, რაც ოდესმე შექმნილა

X-ზე გამოქვეყნებულ პოსტში მასკმა განაცხადა, რომ Tesla Cybertruck-ის წარმოებას დაახლოებით რვა თვეში სრულად შეაჩერებს. მან დასძინა, რომ კომპანია ეცდება დარჩენილ დროში მაქსიმალურად ბევრი ავტომობილი ააწყოს, თუმცა აღიარა, რომ Tesla-ს „უამრავი მომხმარებლისთვის წინასწარ შეტანილი დეპოზიტების უკან დაბრუნება მოუწევს“.

რატომ იხურება Cybertruck-ის ხაზი?

Tesla-ს ბოსი კატეგორიულად უარყოფს ბრალდებებს იმის შესახებ, რომ Cybertruck-ი ფინანსურად წაგებიანი პროექტი იყო. მისი თქმით, წარმოების შეწყვეტის მთავარი მიზეზი რესურსების გადანაწილებაა.

„Cybertruck-ის ტექნიკური სირთულით გამოწვეულ ალტერნატიულ დანახარჯებს ბევრად გადაწონის ის სარგებელი და ღირებულება, რასაც Cybercab-ის დამატებითი წარმოება მოიტანს“, — განაცხადა მასკმა.

მარტივად რომ ვთქვათ, Tesla მიიჩნევს, რომ Cybertruck-ზე დახარჯული საწარმოო შესაძლებლობებისა და რესურსების ორადგილიანი ავტონომიური რობოტაქსების  წარმოებაზე გადართვით კომპანია ბევრად მეტ მოგებას მიიღებს. 

პირველი Cybertruck-ები მომხმარებლებს 2023 წლის ბოლოს გადაეცათ. იმ პერიოდში პროექტი რევოლუციად მოიაზრებოდა — მასკის თქმით, წინასწარი ჯავშნების რაოდენობამ 1 მილიონს მიაღწია, ხოლო კომპანია წლიურად 250 000 პიკაპის გაყიდვას ვარაუდობდა. თუმცა, წინასწარმა ჯავშნებმა რეალურ გაყიდვებში ასახვა ვერ ჰპოვა. მიუხედავად იმისა, რომ Tesla Cybertruck-ის გაყიდვების ცალკეულ სტატისტიკას ოფიციალურად არ აქვეყნებს, ინდუსტრიის ექსპერტების შეფასებით, 2023 წლის ნოემბრიდან დღემდე სულ რაღაც 71 000 ეგზემპლარია გაყიდული.

საინტერესოა ისიც, რომ ამ გაყიდვების მნიშვნელოვანი ნაწილი თავად მასკის ბიზნეს-ეკოსისტემის შიგნით განხორციელდა. მაგალითად, კოსმოსურმა კომპანია SpaceX-მა, სადაც ამერიკელი მილიარდერი (და ორგზის ყოფილი ტრილიონერი) უმსხვილესი აქციონერია, 2025 წელს Tesla-სგან $131 მილიონის ღირებულების Cybertruck-ები შეიძინა. ასევე მოიქცა მასკის კიდევ ერთი კომპანია, xAI — ამ უკანასკნელმა მონაცემთა ცენტრებისთვის $430 მილიონის ღირებულების Tesla Megapack-ის ბატარეები იყიდა.