Mahindra Thar Roxx — Wrangler-ის ინდური „კლონი“, რომელიც 4-ჯერ იაფი ღირს
ავტომობილების ინდურ ბაზარს, ალბათ, მაინცდამაინც კარგად ცოტა ადამიანი იცნობთ. არ დაგიმალავთ, მე მხოლოდ Tata Group და Mahindra & Mahindra მსმენია — სტატია სწორედ ამ უკანასკნელის მოდელს შეეხება. როგორც ჩანს, დასავლური ავტომობილების კლონირებისგან, ჩინელების მსგავსად, თავს არც ინდოელები იკავებენ.
წარმოგიდგენთ Mahindra Thar Roxx-ს რომელიც Jeep Wrangler-ის ძალიან საინტერესო „ტყუპისცალია“. ინდური ავტომწარმოებლის პროდუქტი ადგილობრივ ბაზარზეა გათვლილი და აქ მის უფრო „დაკუნთულ“, ყველგანმავალ ვერსიასაც ვხვდებით — რა თქმა უნდა, Wrangler-ის მოყვარულებს Thar Roxx-ი ვერაფრით გააკვირვებს, თუმცა მისმა ფასმა შეიძლება ყველა დააფიქროს.
Thar Roxx Star Edition-ი მოდელის სხვა ვერსიებისგან გამოირჩევა იმით, რომ მისი ცხაურა ზუსტად Jeep-ის სტილშია გადაწყვეტილი. თვალს 19-დუიმიანი დისკებიც მოგწყვეტთ, თუმცა სხვა ყველაფერი, ერთი შეხედვით, ისეთია, როგორსაც ბიუჯეტური ვრანგლერისგან უნდა ველოდოთ. LED მაშუქები, უკანა გაბარიტული ფარები და ნისლსაწინააღმდეგო მაშუქები სტანდარტულია — მყიდველს არჩევანის გაკეთება ექსტერიერის 4 ვარიანტიდან შეუძლია.
რაც შეეხება ინტერიერს, აქ ყველაფერი შავია — სავარძლებს შავი ფერის ხელოვნური ტყავი ფარავს, ცენტრალურ კონსოლსა და ხელსაწყოთა დაფაზე კი ნახშირბადის ბოჭკოს იმიტაციასა და ამავე ხელოვნური ტყავის აქცენტებს ვხვდებით. ტექნოლოგიურად, Thar Roxx საკმაოდ გულუხვია — 10.25-დუიმიანი ეკრანება, ჩაშენებული Alexa, კამერები 360-გრადუსიანი დაფარვით, უსადენო დამმუხტველი, პანორამული ჭერი, წინა სავარძლების ვენტილაცია და Harman Kardon-ის აუდიოსისტემა — ეს ყველაფერი Wrangler-ის კლონის საბაზისო კომპლექტაციაში დაგხვდებათ.
უცნაურია, მაგრამ მოდელის Star Edition-ი უკანა ამძრავია, თუმცა სხვა კომპლექტაციები გულს არ დაგწყვეტენ და ოთხივე ბორბალს აამოძრავებენ. კაპოტის ქვეშ Mahindra-ს სტანდარტული 2.0-ლიტრიანი, ტურბოჩაბერვის მქონე შიგაწვის ძრავა დაგხვდებათ, რომელიც 175 ცხ.ძ-სა და 380 ნიუტონს გამოიმუშავებს — სიმძლავრე ბორბლებს 6-სიჩქარიანი გადაცემათა ავტომატური კოლოფით მიეწოდება. გარდა ამისა, ხელმისაწვდომია 2.2 ლიტრიანი, ტურბოდიზელზე მომუშავე ძრავიც, რომელიც 171 ცხ.ძ-სა და 400 ნიუტონს გამოიმუშავებს — მისი გადაცემათა კოლოფი კი მექანიკურია. 
როგორც აღინიშნა, გამორჩეული ავტომობილში მისი ფასია — Mahindra Thar Roxx Star Edition-ის დიზელზე მომუშავე მექანიკა 18 400$ ღირს, ბენზინზე მომუშავე ავტომატიკა 19 500$, ყველაზე ძვირი კი დიზელისა და ავტომატიკის სინთეზია — მის შესაძენად 20 000$-ის დახარჯვა მოგიწევთ.
საბაზისო კომპლექტაციის ჯიპი სასაცილოდ იაფიც კი ღირს — მის შეძენას ინდოელი მყიდველი 10 900 დოლარად შეძლებს... ხარისხზე ვერაფერს გეტყვით, ინდური მანქანა არასდროს მყოლია (და, დიდი იმედი მაქვს, არც მეყოლება).
