ჩინურმა ავტომწარმოებელმა მსოფლიოში ყველაზე თერმოეფექტიანი ძრავა შექმნა

ჩინური ავტოინდუსტრიის განვითარების ტემპები უკვე აღარავის გვიკვირს, თუმცა მათი ძალისხმევა მხოლოდ ელექტრომობილებით როდი შემოიფარგლება. ცოტა ხნის წინ ჩინურმა Geely-მ კიდევ ერთი რევოლუციური მიდგომა შეიმუშავა და, როგორც ამბობს, მსოფლიოში ყველაზე თერმოეფექტიანი ძრავა შემოგვთავაზა — აგრეგატი, რომელიც სტანდარტულ მასობრივი წარმოების ძრავებთან შედარებით, თითქმის 50%-იანი თერმოეფექტიანობით გამოირჩევა.

Car News China-ს რეპორტაჟის თანახმად, Geely-მ თავისი უახლესი i-HEV სისტემის წყალობით, მასობრივი წარმოების ძრავაში 48.4%-იან თერმოეფექტიანობას მიაღწია. აღნიშნული სისტემა ენერგიის ეფექტიანად მართვისთვის ხელოვნურ ინტელექტზე დაფუძნებულ ალგორითმებს იყენებს. Guinness-მა დამოუკიდებლად დაადასტურა, რომ ახალი მიდგომით საწვავის მოხმარება 100 კილომეტრზე 2.2 ლიტრს შეადგენს. Geely-ს მონაცემით, ამ ნიშნულის მიღწევა ნებისმიერი i-HEV მოდელით იქნება შესაძლებელი, იქნება ის აღჭურვილი 1.5-ლიტრიანი თუ 2-ლიტრიანი ძრავით.

რამდენად მნიშვნელოვანია Geely-ს მიღებული 48.4%-იანი თერმოეფექტიანობა?

მარტივად რომ გითხრათ, 48.4%-იანი თერმული მარგი ქმედების კოეფიციენტი ნიშნავს, რომ ძრავა საწვავისგან მიღებული ენერგიის თითქმის ნახევარს ავტომობილის მოძრაობად გარდაქმნის — ეს კი რევოლუციური მაჩვენებელია. სტანდარტულად, ავტომობილებში ენერგიის დიდი ნაწილი (დაახლოებით 65-75%) სითბოს სახით უსარგებლოდ იკარგება. Geely-ს სისტემით ძრავა მაქსიმალური ეფექტიანობით მუშაობს, რაც პირდაპირ აისახება საწვავის გამოყენებასა და გარემოზე ზემოქმედებაზე.

დღემდე ყველაზე თერმოეფექტიანი წარმოების ძრავებში ეს მაჩვენებელი დაახლოებით 42%-ს შეადგენდა. ამ დიაპაზონშია, მაგალითად, Nissan-ის e-Power სისტემა და Toyota-ს Dynamic Force ჰიბრიდული ძრავები. ხოლო სტანდარტულად, შიგაწვის ძრავაზე მომუშავე ავტომობილის თერმოეფექტიანობა 20-30%-იან შუალედშია. მეტად თერმოეფექტიანი ძრავა მეტ ცხენის ძალასა და საწვავის ეკონომიას ნიშნავს.

ასევე დაგაინტერესებთ: 10 საუკეთესო „ჰიბრიდი“, რომელსაც 15 000$-მდე შეიძენთ

ჰიბრიდული სისტემები კი ამ მიდგომის განვითარებაში მნიშვნელოვან როლს თამაშობენ. ამ ტიპის სისტემებს დახარჯული ენერგიის შენახვა და დაქოქვა-გაჩერების დროს მისი ხელახლა გამოყენება შეუძლიათ. Geely-ს მაჩვენებლები კი ფორმულა 1-ის ნიშნულს უახლოვდება, რაც რევოლუციური შედეგია.