Vigilante-ს მორიგი შედევრი | ტუნერებმა Jeep CJ-8 Scrambler-ი განაახლეს

ვიდრე Jeep-ის ხაზში თანამედროვე Gladiator-ი გამოჩნდებოდა, აქ საკულტო CJ-8 Scrambler-ი მეფობდა. 1981 წელს გამოსული ეს მოდელი, ფაქტობრივად, CJ-7-ის ორადგილიანი ვერსია იყო სატვირთო პლატფორმით. მართალია, თავდაპირველად ის განსაკუთრებული პოპულარობით არ სარგებლობდა, მაგრამ ათწლეულების გასვლასთან ერთად ნამდვილ საკოლექციო ობიექტად იქცა. სწორედ ამიტომ, ტუნინგ-ატელიე Vigilante-მ გადაწყვიტა, ამ ლეგენდის თანამედროვე, ულტრა-ძვირადღირებული ვერსია შეექმნა.

მიუხედავად იმისა, რომ ავტომობილი პირდაპირ 80-იანი წლებიდან გადმოსულს ჰგავს, ის დაგრძელებულ პლატფორმაზეა აგებული, რაც მართვის ხარისხსა და სტაბილურობას მკვეთრად აუმჯობესებს. ორიგინალისგან განსხვავებით, ეს სრულფასოვანი ოთხადგილიანი პიკაპია, თუმცა ამის გამო სატვირთო ნაწილის მოცულობა შემცირდა. ძარა დამზადებულია ალუმინისგან, ხოლო 17-დუიმიანი დისკები წარსულის დიზაინს ზუსტად იმეორებს.

ვინტაჟური სტილი შენარჩუნებულია სალონში — სამქიმიანი საჭე AMC-ის ლოგოთი და კლასიკური მაჩვენებელთა პანელით ადგილზეა. თუმცა, მოძველებული გარეგნობის მიღმა თანამედროვე კლიმატ-კონტროლი და Bluetooth-აუდიოსისტემა იმალება. ინტერიერში გამოყენებულია უმაღლესი ხარისხის მასალები, მომხმარებელს კი შეუძლია აირჩიოს სამი ფერიდან ერთ-ერთი.

V8 სიმძლავრე და ინჟინერიის შედევრი

რაც ყველაზე მთავარია, კაპოტის ქვეშ ნამდვილი მხეცი იმალება — 6.4-ლიტრიანი Hemi V8, რომელიც 485 ცხენის ძალასა და 643 ნიუტონ-მეტრს გამოიმუშავებს. მყიდველს შეუძლია აირჩიოს ხუთსიჩქარიანი მექანიკური ან ოთხსიჩქარიანი ავტომატური გადაცემათა კოლოფი.

Vigilante-მ სრულად შეცვალა დაკიდების სისტემაც — ძველი რესორების ნაცვლად აქ თანამედროვე ოთხბმულიანი სისტემა და Dana 44/60-ის ხიდები გვხვდება. დამუხრუჭებაზე კი მაღალეფექტიანი სისტემაა პასუხისმგებელი.

ავტომობილის საწყისი ფასი 260 000 დოლარია. ეს თანხა საკმარისია სამი სულ ახალი Wrangler Moab 392-ის შესაძენად და ფული Nissan Kicks-ისთვისაც დაგრჩებათ. თუმცა, Vigilante-ს თითოეული ეგზემპლარი ინდივიდუალურად, კლიენტის გემოვნებით იწყობა, ამიტომ, შესაძლოა, ამ თანხის გადახდა აბსოლუტურად ღირდეს...