დედის ელვისებურმა რეაქციამ მცირეწლოვანი შვილი სიკვდილისგან იხსნა
მშობლობა უდიდესი პასუხისმგებლობაა — ამ პასუხისმგებლობასთან ერთად კი ზეადამიანური რეფლექსებიც ვითარდება (დედების სუპერგმირობის შესახებ კი ალბათ ყველას გვსმენია). ამ შემთხვევაში დედის ელვისებურმა რეაქციამ მისი მცირეწლოვანი შვილის სიცოცხლე იხსნა — სულ რაღაც წამის მეასედით ადრე, სანამ მერსედესის სედანი მათ გაჩერებულ ჰეჩბეკს, Volkswagen Polo-ს დაეჯახებოდა.
შემთხვევა 3 ივნისის დილას, დასავლეთ საბერძნეთის სანაპირო ქალაქ ნაფპაკტოსის პორტის მოედანთან მოხდა. ახლომდებარე მაღაზიის სათვალთვალო კამერამ დააფიქსირა, თუ როგორ მიუახლოვდა 39 წლის დედა თავის წითელ VW Polo-ს და უკანა სავარძელზე ბავშვის უსაფრთხოების ღვედი გახსნა. როგორც კი დედა-შვილი წინა მგზავრის მხარისკენ გადაადგილდა, ქალმა მოულოდნელად აიტაცა შვილი ხელში და მაღაზიებისკენ გაიქცა, რითაც საფრთხის ზონას სულ რამდენიმე სანტიმეტრით დააღწია თავი.
სწორედ ამ დროს, ხანშიშესულმა მძღოლმა თავის საკულტო, ძველი სკოლის Mercedes-Benz S-Class (W126)-ზე მართვა დაკარგა. მანქანა საპირისპირო ზოლში გადავიდა, გადაუარა გაჩერებულ მოტოციკლებს და პატარა Polo-ს მთელი ძალით შეეჯახა. დედამ ძრავის ღმუილი გაიგონა და წამებში ერთადერთი სწორი გადაწყვეტილება მიიღო.
ავარიას სხვა მსხვერპლიც შეიძლებოდა მოჰყოლოდა — კადრებში ჩანს ფეხით მოსიარულე მამაკაციც, რომელიც ნამსხვრევებისგან თავის დასაცავად უახლოეს მაღაზიაში შევარდა. მერსედესმა ასევე გაკაწრა იქვე მდგარი Peugeot 3008.
„საცხობში შევედი ჩემი პატარასთვის რამის საყიდლად, ის კი უკანა სავარძელზე მყავდა დაბმული. როცა გამოვედი, მითხრა, რომ მანქანიდან გადმოსვლა უნდოდა. ღვედი შევუხსენი და გადმოვიყვანე. მადლობა ღმერთს, რომ ბავშვმა გადმოსვლა მოითხოვა, უკანა სავარძელზე რომ დამეტოვებინა, ის აუცილებლად დაიღუპებოდა“, — განუცხადა დედამ CNN Greece-ს.
როდესაც ადგილობრივები მერსედესის ხანდაზმულ მძღოლთან მიცვივდნენ, ის სრულიად არაადეკვატური ჩანდა და ვერ აცნობიერებდა, რა მოხდა. მოგვიანებით მან თქვა, რომ არ იცის, რამ გამოიწვია ავარია და ვარაუდობდა, რომ გაზის პედალი გაეჭედა.
პოლიციამ დაადასტურა, რომ მძღოლს ალკოჰოლური თრობა არ აღენიშნებოდა, ხოლო ინციდენტის შედეგად არავინ დაშავებულა. 75 წლის მამაკაცს ახლა რამდენიმე მუხლით ედება ბრალი, მათ შორის გაუფრთხილებელი მართვისთვის. მას მართვის მოწმობა მომენტალურად ჩამოერთვა, ხოლო საბერძნეთის ტრანსპორტის სამინისტრო გადაწყვეტს, მიეცემა თუ არა მას საერთოდ ოდესმე საჭესთან დაჯდომის უფლება.
