იტალიაში ხანდაზმული მძღოლებისთვის ავტომობილით გადაადგილება ნაწილობრივ იზღუდება

იტალიის მთავრობამ უარი თქვა ინიციატივაზე, რომელიც 85 წელს გადაცილებული მძღოლებისთვის საგზაო შეზღუდვების დაწესებას ითვალისწინებდა. საგზაო მოძრაობის წესების განახლების პროექტის პირველად ვარიანტში იგეგმებოდა ხანდაზმული მძღოლებისთვის ავტობანებზე მოძრაობის აკრძალვა, საცხოვრებელი ადგილიდან გადაადგილების მანძილის შეზღუდვა და ალკოჰოლის ნულოვანი ტოლერანტობის დაწესება.

საწყისი კანონპროექტის მიხედვით, 85 წლის ასაკის მიღწევისას მართვის მოწმობის განახლებისას ავტომატურად ამოქმედდებოდა სამი ძირითადი შეზღუდვა — ავტობანებზე მოძრაობის სრული აკრძალვა, სახლიდან მაქსიმუმ 100 კილომეტრის რადიუსში გადაადგილების უფლება და სისხლში ალკოჰოლის აბსოლუტურად ნულოვანი ლიმიტი.

გამონაკლისი და მთავრობის საბოლოო გადაწყვეტილება

კანონპროექტი ითვალისწინებდა გამონაკლისსაც: ხანდაზმულ მძღოლებს შეეძლოთ ადგილობრივი სამედიცინო კომისიისთვის მიემართათ შეზღუდვების მოსახსნელად, თუ კვლევები დაადასტურებდა მათ ფიზიკურ და ფსიქიკურ მზადყოფნას. თუმცა, სტანდარტული სამედიცინო შემოწმების გავლისას ეს შეზღუდვები ავტომატურად ამოქმედდებოდა.

იტალიის ინფრასტრუქტურისა და ტრანსპორტის სამინისტროს განცხადებით, ტრანსპორტის მინისტრის პირდაპირი მოთხოვნით, აღნიშნული მკაცრი შეზღუდვები კანონპროექტიდან ამოიღეს.

ავტომატური აკრძალვების ნაცვლად, იტალია გეგმავს უფრო მკაცრი და სიღრმისეული სამედიცინო შემოწმებების შემოღებას. გარდა ამისა, სენატში განსახილველად შევიდა წინადადება, რომ 85 ან 90 წლის ასაკს მიღწეულმა მძღოლებმა მოწმობის განახლებისას პრაქტიკული მართვის გამოცდაც ჩააბარონ.

აღსანიშნავია, რომ იტალიაში ხანდაზმული მძღოლებისთვის მართვის მოწმობის მოქმედების ვადა ისედაც შემოკლებულია: 50 წლამდე — მოქმედებს 10 წელი, 50-დან 70 წლამდე — 5 წელი, 70-დან 80 წლამდე — 3 წელი, 80 წლის ზემოთ — ყოველ 2 წელიწადში ერთხელ.

საგზაო კოდექსის განახლება მხოლოდ ხანდაზმულებს არ ეხება. იტალია ასევე ამკაცრებს სასჯელს საჭესთან სმარტფონით სარგებლობაზე. ამასთან, იგეგმება ცვლილებები, რომლებიც მძღოლებს მარჯვნიდან გასწრების უფლებას მისცემს, ხოლო მოტოციკლისტებს — საცობების დროს გზის გვერდულაზე მოძრაობის ნებართვას.