უგზოობის მტერი იაპონიიდან
სრულამძრავიანი ავტომობილების დანიშნულება უგზოობასთან გამკლავებაა, თუმცა აღნიშნული ავტომობილები დროთა განმავლობაში იმდენად მოთხოვნადი გახდა, რომ მათი კლასიფიკაცია რამოდენიმე ნიშნით დაიყო. უფრო კონკრეტულად კი SUV-ებში ისეთი მოდელებიც არსებობს, რომლებიც უგზოობაზე ნაკლებად არიან ორიენტირებულები. მაგრამ ძარის ამ ტიპის წარმომადგენლების საწყისი იდეა რთული უგზოობების გადალახვა იყო.
იაპონური წარმოება ამ კლასის ერთ-ერთი ლიდერია და რა თქმა უნდა, ამ კლასში Toyota მეტად გამოირჩევა. თუმცა Nissan-ს ერთი მოდელი ჰყავს, რომელსაც მისთვის ღირსეული კონკურენციის გაწევა ნამდვილად შეუძლია. დღეს ჩვენ Nissan-ის ლეგენდარულ ყველგანმავალზე ვისაუბრებთ, რომელიც Off Road-ის მოყვარულებში დიდი რეპუტაციით სარგებლობს. Nissan Patrol-ის წარმოება 6 თაობას ითვლის და ჩვენ მათში ერთ-ერთ წარმატებულ მოდელს გავიხსენებთ.
მე-5 თაობის Patrol-ი მძიმეწონიანი Off Roader-ისთვის საკმაოდ შესაფერისად გამოიყურება და ეს მხოლოდ ვიზუალურ მხარეს არ გულისხმობს. ამ მოდელში ყველაზე მძლავრი ძრავა მწკრიული განლაგების 6-ცილინდრიანი 4.8 ლიტრი მოცულობის ბეზნინზე მომუშავე აგრეგატია, რომელსაც 251 ცხენისძალა და 420 ნიუტონი აქვს. სიმძლავრის დიაპაზონი უგზოობაზე უფროა მორგებული, ვიდრე აჩქარებაზე, თუმცა არც ეს მაჩვენებელი აქვს ურიგო - თითქმის 2.5-ტონიანი უზარმაზარი ავტომობილი 100-მდე 10 წამში ჩქარდება.
ამ მოდელში სამი ტიპის გადაცემათა კოლოფია ხელმისაწვდომი - ერთი მექანიკური და ორი ავტომატური. აღსანიშნავია, რომ ორი ავტომატური კოლოფიდან 2-ვე 5-სიჩქარიანი იყო, თუმცა არსებობს ისეთი ავტომატური გადაცემათა კოლოფიც, რომლითაც სიჩქარეების შეცვლა სეკვენტალურად იყო შესაძლებელი. მე-5 თაობის Patrol-ი 1997 წლიდან იწარმოება. აღნიშნულ პერიოდში კი, მსგავსი გადაცემათა კოლოფი ინოვაციური იყო და მას ანალოგი არ ჰყავდა.
წარმოებას რაც შეეხება გეტყვით, რომ მისი ხანგრძლივობა 1997-დან 2016 წლამდე გრძლდებოდა, თუმცა მოროკოში და სამხრეთ აფრიკაში ეს მოდელი დღესაც უცვლელად იწარმოება. ეს ფაქტი მის დიდ სანდოობაზე და დადებით რეპუტაციაზე აშკარად მეტყველებს.
